KHRIST A SIAMTHAKNA

Mihingte hinkhua ah khatveivei hoih kisakna leh khelhna neilou bang a om hun a om sek hi. Hichi bang ngaihtuahnate nei kha zel mahlehang kuamah khelhna neilou i om kei uhi. Siangthou tak a om kahi kichi in khelhna thupilua hih khalou kahi i kichih ziak in khelhna neilou i hi zenzen keihi. Diktatna toh siangthoutak a hunte zang kahi kichi te’n inleng bang hiam hun in lungsim ah kisiamtan louhna, hon sukha mahmah Pathian deihlouh dan i na hih khak uh a om sek hi. Hun paisate a i na gensek mah bang un, i ngaihtuahnate mai uah leng i khial sem diak uhi.

 Sawltak Paul in ana gen mah bang in, “….Hoihna hih ka ut pen ka hih kei a, khelhna hih ka utlouhpen, ka hih zawnak hi. Ka utlouh lam pen ka hih ngal chiang in, a hihpa kei ka hita kei a, khelhna keimah a om pen ahizaw hi.” – Romte 7:19. Hiai a Sawltak Paul in a gen tuh mihing tengteng adia zattheih ahi a, hiai gingta lou i hihle bel mahni leh mahni kikhem banah zuau gen i hi ding hi.  Romte 7 sung na a chang 18b na ah hichi’n hon gen nawn hi, “…thil hoih hih utna keimah ah a om na a, thil hoih ka hihthei kei.” Sawltak Paul bang a thutak gen khiat theih tuh ei gingtu a ding in poimoh mahmah hi. I hihnate uh i ki iim sek uh a, bang hiam i hihte uh mite theihdi bang i lau mahmah uhi. I hih na bangbang un Toupa mai a kitulut thei gige hileng Toupa ompihna toh khelh theihna apan suahtakna i neithei zaw ding uhi.

Chihleh bang chibang a Khrist a siamthakna neithei ding i hia? “Huchi a hih ziak in, kuapeuh Khrist a a om leh thilsiam thak a honghi a; thilluite a mangta a, ngai un, a hong thakta uhi,” – 2 Kor. 5:17. I hondampa Jesu Khrist tungtawn kia in siamthakna i neithei pan uhi. Khrist a omlou pi, i hinkhua luite uh hih zomzel a kibawl thakna leh kisikna taktak i neihma uh siamthakna taktak nei kahi i kichi thei kei uhi. Chihleh siamthakna bang hi hiam? ‘Thilluite a mangta, ngai un a hong thakta uhi’ bang genna hiding? Thil hoih loute a pan tawpna, i hunpaisa ua khelhnate apan suahtakna, hih nawnlouhna ahi. Tua te bangbang hi hiam? “Huan sa thilhihte a kilang chian hi, huaite hiaite ahi uh: angkawmna, kingaihna, thanghuaina, hukna, Milim biakna, bumna, huatna, kinakna, hazatna, hehna, kilanna, omtuamna, gintuamna Deihgohna, tualthahna, zumun nopna, zukhamna, huchibang thilhih chingte’n Pathian gam a tangkei ding uh chi a tuma a k’on hilhkholh mah bang in, k’on hilhkhol ahi.” – Galatiate 5:19-21. Hiaite apan khial thei nawnlou himhim ding chih ahi pah kei a, himahleh hiaite piching utlouhna, tawp utna lungsim neihna leh hiaite apan kikepbitna toh siangthoutak a om utna i nei ding hi. Hunpai sate a i na khelh khaknate ua pan kisikna, Pathian mai a kipuang khiatna apoimoh mahmah hi. Kisikna kichian tak neilou in siamthak a om kahi chih ahi theikei hi.

Khelhna khovel a khosa lai i hihziak un pilvangna ding atam mahmah hi. Toupa khut hat muanhuai a kikepbitsak apoimoh den a, i hunte uh atam theipen Amah toh ton a om khawm gige a poimoh lota hi. I etna lamlam uleh i ngaihtuahnate uh atam zaw khelh utna a hisek hi. Melma hon dou gige leh i siat theihna ding ua honpi ut om den ahi chih kiphawk thakthak in eimah hatnate muang mailou in Toupa toh tonkhawm gige in i niteng hunzatna ua Amah ompihna nget gige alou theilou a i koih uh apoimoh hi.

Thilhoihlouh hih utna apan kisikna nei a hondamtu i Toupa Jesu Khrist i hondampa dia sang a Amah i belh chiang un siamthakna i neithei ding ua, huchi’n Kha-gah tampi muh theih aom ding hi. “Kha gah ahihleh, itna, kipahna, lemna, thuaktheihna, migitna, hoihna, muanhuaina, Nunnemna, kidektheihnate a hizaw uhi; huchibang kalh lam in danthupiak himhim a omkei hi.” – Galatiate 5:22:23. Kisikna neilou leh khelhnate hih ut nawnlouhna omlouhna ah hiai khagahte a om theikei hi. I Toupa Jesu Khrist a kimuhchetna om chiang in ahi siamthak a i om theihna uh, Amah khelhna khatmah leng neilou hina pi eite khelhna tengteng apan hon hondam dingin Pathian in khelhna nei in Amah a bawl hi. “Amah a Pathian diktatna i hong hih theihna ding in khelhna himhim theilou amah Pathian in eite ziak in khelhna in a bawl hi.” – 2 Kor. 5:21.  Thupi leh hampha hina hang e! Hiai pen ahi i theihsemsem ding uleh i phawk gige ding ua apoimoh mahmah. I Toupa Jesu Khrist kiang kia ah ahi siamthak a i om theih uh.

Tukal a i Weekly Inspiration ua pan in bang sin ding i nei a? Jesu Khrist kia lou ngal thildang apan hon hondam thei ding a om keihi.  Eimah hoihna ziak leh diktatna ziak inleng siamthakna neih ding  aom keihi. I Toupa Jesu Khrist tungtawn kia in ahi hotdam a  i omtheih uh. Amah a ki tulut in, Amah ah muang in, Amah toh hinkhua zang gige leng khovel khelhnate apan suahtakna i nei ding uhi. Amah kia ah ahi siamthakna leh hotdam a i om theih uh.

“Midang kuamah kiang ah hotdamna a omkei, van nuai a mihing sak lak ah, hon hondam ding min dang a omkei” a chi hi. – Nasepte 4:12.

Toupa’n i thugelhte tungtawn in theihsiamna leh Khamuanna i tanchiat uah hon  piak i ngen a; theihna bukim louh ziak a i  gen khelh omte angaihdamna i ngen lailai hi.

• Thangginom Hangshing

 (Laigelh toh kisai kupbeh nuam omleh, Laigelhtu +919615804759 ah thuzaak theih diing)

28^th July, 2021 | Weekly-Inspiration – 79