\"Ei vuak in I om ngeikei..!\"

"Ei vuak in I om ngeikei..!"

Toupa'n eite I khelhna hotdam a I om theih na ding a a Tapa hon sawl ngam leh eite hon nuse ngeilou ding hi. Leitung ah omlai ihih ziak in I hinkhua ah, lungbuai na ding hong om zel mah leh Amah a lungkimna thuguk om gige hi. Ki deidanna, ki melmakna, haksatna leh thil ki khekkhek na khovel ah I om a, khat veivei I hinna uh a lauh huai hun om sek hi, lungmuan theih na taktak om thei nawn lou bang hi. Nop I sak na ding, I kipahna ding leh lungmuanna ding zongzong mah lenleng, Pathian lou ngal hon lungmuang sak thei ding leh hon kipaksak thei ding ki mulou in, omlou hi. Tua bang hunte a Laisiangthou te sim a, lungmuanna I lamet ding ahi. Ei vuak in I om ngeikei a, Toupa'n I kiang ah a om gige hi. Isaiah 41:13 "Kei Toupa, na Pathian uh ka hi; nou kon haatsak a, na kiang uah, 'Lau kei un, kon panpih diing' ka chi hi." Lungnopna leh panpih na I muhte uh midangte apat ahikei a Toupa apat ahi. I thumna neihte apat panpihtu ding a hon pezel hi.

Psalm 121 "Panpihna tuh lei leh van Siampa, Toupa a kipan a hong pai ahi" c2.

Thomhau kei ni, taitak leh kipaktak in om ni. "Toupa tuh nang hon chingpa ahi a, Na taklam a, nang hon liahtupa ahi hi." c5 "Hoihlou chiteng apan, Toupa'n nang hon kem dia, na hinna akembit diing hi." c7 "Toupa'n na pawtkhiak leh na luut lam akeem diing hi; tu akipan a taangtawn dong in." c8 Tukal a dia I thu khit nading in, Deut. 31:6 "Tum tinten leh ngaihmuangtak in om unla, amau kihta kei un. Na Pathian uh Toupa ngei tuh na kiang ua om diing a, hon nuse ngei sam kei diing hi." - Thangginom Hangshing